A coexistencia de novas de signo contrario non é unha excepción, senón que ocorre moitas veces. Ese 'signo' non indica que digan o contrario, senón que expresan facetas da realidade que chocan entre si.
Así, a pobreza que hoxe sae na prensa non é contraditoria con que o CCA siga a promocionar o comercio cun premio o consumo, que eso é o que indica un premio de 300€ que pensan dar. A outra, a pobreza manifestada, é a dunha familia que vive na antiga vía do ferrocarril, na única chabola habitada como vivenda habitual que coido hai na vila. Vivir como chabolista indica certo grao de pobreza, non a pobreza absoluta. Neste caso, xúntanse varias cousas: a chabola, o desemprego, a etnia, ... e ó final, según din, o peloteo entre alcalde e (esta vez) o asistente social. Con todo o amañable que poda ser o que se ve de inmediato por parte dos poderes públicos, a razón da pobreza é máis profunda que o dito, en Ribadeo e en xeral. O mundo non é perfeto, e os máis débiles sufren máis. Deberamos poñernos a amañalo, pero a falta de saber máis, de saber como facelo, de lamentar ter poder para poñerse ña tarefa, coido que o levantármonos cada día pensando en facer as cousas ben e para ben é xa un paso adiante, que significa que estamos a poñernos, aínda que non o saibamos. A orde económica local, nacional ou internacional non é xusta, e segundo o vexo, tende a ser máis inxusta. A postura individual de cada un pode reverquer este camiño cara a esa sociedade con máis inxusticia, pero para eso fai falta o dito... e non desanimarse, cun pouco de estilo do Quixote. Así se poden conseguir cousas, aínda que se tarde. E para os de a pé pode que sexa a única opción posible.
Outro día podemos falar de como outra organización do comercio internacional foi posible pero leva sesenta anos aparcada por 'grandes intereses' (título aproximado dun artigo que leín onte mesmo) mentras as diferencias aumentan.
A foto, unha mágoa non tela tomado com máis amplitude de fondo, a auga escurrindo por unha rocha cara á saída da ría de Ribadeo.
Ningún comentario:
Publicar un comentario