... e ó fin, a campaña finaliza hoxe

Din que foi non a máis dura, senón a máis rastrera que se lembra. Onte, a charla de Onda Cero rematou con dous minutos para falar sobre a impresión da campaña. Un contertulio, José Mª Rodriguez, dixo o que eu remato de dicir. Eu contenteime con dicir algo así como 'se un político quere ser crible nas próximas eleccións, nestas debería saír pedir a abstención'. É dicir, algo que non vai suceder por ser unha especie de contradicción. Pero o caso é que cada vez máis, vexo posible unha situación parella á que descrebe Saramago no seu 'Ensaio sobre a lucidez' (e que xa toquei algunha vez no blog), unha votación con maioría aplastante de votos en branco e coa posibilidade de que o país, a estrutura social, siga funcionando a pesares dunha guerra declarada da estrutura política fronte á sociedade. Isto último, algo que xa planea como realidade en moitas cabezas.
Mañá será a 'xornada de reflexión', un feito que parece negar precisamente a posibilidade de reflexión á deixala referida a unha soa xornada, mentras permete que se bombardee con anuncios o resto do tempo. Anuncios que xa se asume, pola experiencia previa, que non teñen ningún valor: peor que papel mollado, pois non soen aparecer nun documento asinado, senón recollidos como noticia.
Algunha anécdota despois de cumprir que pouco ía tratar das eleccións no blog: remato de mirar 'eleccións 2009' no buscador e a páxina oficial da Xunta sae ... no 5º lugar, abondo despois, por exemplo, do vídeo promocional sobre a 'Frente Popular Galega'.
Vexo na web as 'CANDIDATURAS PROCLAMADAS NA CIRCUNSCRICIÓN ELECTORAL DE LUGO', e son as seguintes:
1. PARTIDO DOS SOCIALISTAS DE GALICIA-PARTIDO SOCIALISTA OBRERO ESPAÑOL (PSdeG-PSOE)
2. PARTIDO POPULAR (P.P.)
3. BLOQUE NACIONALISTA GALEGO (B.N.G.)
4. UNIÓN, PROGRESO Y DEMOCRACIA (UPyD)
5. NÓS-UNIDADE POPULAR (NÓS-UP)
6. ESQUERDA UNIDA - IZQUIERDA UNIDA (EU-IU)
7. POR UN MUNDO MÁS JUSTO (PUM+J)
8. FALANGE ESPAÑOLA DE LAS J.O.N.S. (FE de las JONS)
9. TERRA GALEGA (TEGA)
10. GALICIA UNIDA (GU)
11. PARTIDO HUMANISTA (PH)
12 + GALICIA (+G)
13. FRENTE POPULAR GALEGA (F.P.G.)
Pregúntome, cal é a orde na que se dispoñen as candidaturas?. Por certo, a FPG ista volta sae na última praza. Picoume a curiosidade de que son algunhas delas, e tentarei procurar información. Pero non agora.
Non podo deixar de comparar o ambiente das eleccións con citas dun artigo atrasado que remato de ler onte: 'Non hai patria pequena á hora de defendela' sería algo tildable de cousas como patrioterismo, pero se vai seguido de 'o home que da súa patria non esixe máis que un palmo de terra para a súa sepultura, merece ser oído, e non só ser oído, senón tamén ser crido', a cousa xa comeza a ter algo máis de corpo. Polo medio, o concepto de patria e algún máis que cabería matizar abondo, pero as ideas de Sandino, de quen son as citas, piden ser escoitadas, non ser aceptadas tal cual de xeito universal.
Mañá, reflexión, será asemade o momento de comentar unha serie de novas atrasadas en relación con Ribadeo...