Guirilandia

Ribadeo está cambiando, como calquera ser vivo. Está recibindo novos aportes e facendo contribucións.

A foto amosa un novo grupo (xa non tan novo, ten un par de anos) de vivendas ocupadas en xeral polo que se chamou cando a manifestación para a defensa da ría e contra a nave de Galigrain 'residentes temporais' (noutro momento, algo de Galigrain). A verba 'guirilandia' sería en principio aplicable ó lugar ou lugares de onde proveñen os guiris, pero por derivación da mesma, coido que tamén é aplicable ós asentamentos de guiris, como o que se amosa na fotografía. E, por extensión, polos comportamentos mimetizados dalgúns lugareños, coido que tamén se podería aplicar a todo Ribadeo: hai momentos que algún ribadense parece máis guiri que os mesmos guiris, e algún 'residente temporal' máis integrado que algún autóctono. Asemade, mesmo as infrastruturas das que se está a dotar Ribadeo parece moitas veces que non corresponden a Ribadeo, senón a algo alleo. O ascensor da Atalaia segue aí, cara adiante, a pesares da oposición, sen saber canto vai costar o seu mantemento, sen un mínimo de previsión orzamentaria, sen pés nin cabeza, pero arrastrándose cara adiante. Un domingo con vento pero con Sol, final de ponte para algúns, da pé a afondar no anterior a pouco que se pasee por Ribadeo...