Visitantes por milleiros

Onte sábado a 'heroican race' encheu Ribadeo. 1000 participantes, a grande maioría de fóra, que viñeron acompañados nun día de sol en plenas festas. Un día máis de cheo total na nosa vila, algo que se está a converter en normal boa parte do ano. E non só son anuncios triunfalistas das notas do concello, que cualifican o verán como 'histórico', senón o saír á rúa calquera día ou a comparación co que pasa noutros lugares. Así, onte mesmo, un xornal atribuía 62 000 atendidos polas oficinas de turismo de Ribadeo, fronte a 27 000 pola de Viveiro. Ou sexa, en números redondos, Ribadeo atendeu nas súas oficinas de turismo o 220% de turistas en relación a Viveiro. Por suposto, as cifras de visitantes son superiores.

E a cousa non remata aquí: a catro de setembro, quedan momentos clave das festas, e xa están programados outros eventos -aí está a xuntanza de drones en dúas semanas- para seguir coa enchente de xente. Outro día podemos falar de contrapesar beneficios e fartazgo, do mesmo xeito que xa ten comezado a pasar noutros lugares, ou da xentrificación que supón a acción sobre o centro de Ribadeo (polo turismo e xestión de servizos tanto como pola xentrificación común) ou dos comentarios como 'fuxir do centro' ou 'eu non vou ás terrazas do centro, agóbiome', que escoitei esta mesma mañá.