Ribadeando: Bandeiras azuis, bandeira negra

20170510

Bandeiras azuis, bandeira negra

Din que as bandeiras azuis son un símbolo do bo estado das instalacións e protección da natureza en lugares que teñen que ver co mar. Coido que xa teño falado máis dunha vez sobre este tema, e axustado que unha entidade privada non pode garantir que o coidado da natureza sexa o representado por unha bandeira azul, mais de calquera xeito, algo simbolizan. E Ribadeo remata de obter, un ano máis, varias. Coido que falta algunha das que se concederon outros anos (a do porto deportivo), pero estimo que o seu mantemento correspondería a outra entidade diferente do concello, o que leva a un trato aparte dese caso.
Unha das bandeiras azuis corresponde ó "sendeiro que discorre entre o faro da Illa Pancha e As Aceas". E aí ven o de bandeira negra. Bandeira pirata que se podería enganchar ó comezo da ruta despois do secuestro dunha illa de 10000 m² por unha concesion de 500 m². Unha illa que parece ser o segundo lugar máis visitado de Ribadeo e no que non se pode entrar a non ser que durmas alí a prezo de pazo. Despois, o camiño discurre á beira dunha prácida ría que está mesmo sendo rexerada en árbores autóctonos ó seu paso, tendo só en contra desa conservación ambiental e de servizo público o que as antes limpas augas e fondos de Porcillán se vexan agora emporcadas ó non haber a renovación mareal coa forza de arrastre que tiña antes ó estar incluído ese porto nunha rada cunha estreita abertura que agora se quere dificultar aínda máis para ganar unhas poucas prazas de amarre no porto deportivo.